A Xunta adxudicou por máis de 214.000 euros a obra destinada á mellora da praza pública de Pacios, no concello lucense de Paradela. Segundo informou o Executivo galego, a actuación conta cun prazo de execución de catro meses e o obxectivo é mellorar a praza localizada diante do antigo concello.

A obra consistirá, fundamentalmente, na pavimentación do chan con pedra, na reparación de sumidoiros e a incorporación de iluminación e mobiliario urbano como bancos de pedra e papeleiras.

Esta actuación realizarase no marco do plan Hurbe, da Xunta, que ten o obxectivo de axudar ás administracións locais a financiar estes proxectos municipais. Desta forma, a Xunta financiará o 70% da obra e o concello asumirá o 30% restante.

CENTRO SOCIAL DE VILALVITE

Por outra banda, a Consellería do Medio Rural asinou un convenio para a concesión dunha axuda de case 132.000 euros coa finalidade de realizar un proxecto de urbanización exterior e rehabilitación interior do centro social de Vilalvite, no concello lucense de Friol.

O proxecto consistirá na mellora das instalacións, actualmente deterioradas, para que ofrezan condicións de seguridade, salubridade e habitabilidade adecuadas para que os veciños “poidan gozar delas”. Na parte exterior, acondicionarán a parcela onde se sitúa a edificación, coa construción dunha superficie horizontal empedrada para unha nova rampla e escaleira.

Así mesmo, habilitarán unha parte da parcela para realizar un aparcadoiro de vehículos, mantendo a mesma topografía. Por último, ocultarán o saneamento das cunetas existentes e crearán unha nova zona para os colectores de lixo.

No que respecta ao interior do centro social cambiarán as carpintarías e acabados interiores e exteriores. Ademais, rehabilitarán as cubertas da edificación e acondicionarán o aseo, a rampla e escaleiras que dan ao exterior para adaptalas ás persoas con mobilidade reducida.