A voceira popular, Katy Varela, considera que é unha nova estratexia de José Tomé “para lavarse as mans ante un problema moi importante que temos na cidade e o único que fai é confundir aos veciños e o que é peor, implicando aos cidadáns nun enfrontamento máis coa Xunta”.
Os populares monfortinos recordan que a Xunta subvenciona totalmente as prazas de gardería de 0 a 3 anos, ademais de que desde a aprobación da lei demográfica traballa en consonancia cos Concellos cunha orde de axudas periódicas para mellorar, crear e ampliar as prazas de gardería. “Isto é o que debería facer o alcalde, pero non o fixo”, lamentan.
Doutra banda, Katy Varela recorda que non todas as garderías da contorna son de titularidade autonómica, como é o caso de Sober, A Pobra, Bóveda ou O Saviñao. Son garderías de titularidade municipal que se acollen ás distintas ordes de axuda da Xunta para mellorar e ampliar as súas instalacións.
Dende o PP instan a José Tomé a facer memoria “xa que cando formaba parte do goberno do anterior alcalde, Severino Rodríguez, non aproveitaron a oportunidade de crear novas prazas de gardaría en Monforte polo que agora non se entenden as présas e os reproches cara a Xunta, sobre todo cando implica ás familias monfortinas a través de enganos”.
