A Vicepresidencia da Deputación de Lugo colaborará coa organización da Subida a Taboada, que se celebrará os días 4 e 5 de novembro. O vicepresidente da Deputación e deputado de Deportes Efrén Castro e o concelleiro de Cultura, Deportes e Medio Rural de Taboada Manuel Diéguez reuníronse esta semana para concretar unha colaboración institucional que permita recuperar esta proba de montaña, despois de dezasete anos sen celebrarse.
Efrén Castro encadrou “a colaboración coa proba no apoio da área de Deportes ao automobilismo, con achegas e colaboracións cos rallys de asfalto e montaña que se celebran nas distintas comarcas e tamén con programas e convocatorias específicas para pilotos de rally”.
Efrén Castro e Manuel Diéguez, acordo Subida a Taboada / Vicepresidencia da Deputación
Manuel Diéguez incidiu no “compromiso da concellería de Deportes de Taboada para facer realidade a recuperación deste rally, que queremos consolidar como un referente desta modalidade na comarca aproveitando tamén a oportunidade que supón para dinamizar a vila”
A Subida a Taboada será a ultima proba do Campionato Galego de Montaña, a segunda na provincia, despois da Subida á Pontenova, que tamén conta coa colaboración da área de Deportes da Vicepresidencia da Deputación de Lugo.
