A xuntanza tivo lugar en Pantón co alcalde deste municipio, José Luis Álvarez, como anfitrión. Xunto a el estaban ademais outros oito alcaldes e voceiros de Bóveda, Folgoso do Courel, Monforte de Lemos, A Pobra do Brollón, Quiroga, Ribas de Sil, O Saviñao e Sober, onde estivo posteriormente co autobús de ‘Galicia non para!’.
Todos eles tiveron así a oportunidade de trasladarlle ao líder do PPdeG as prioridades, preocupacións e reivindicacións dos veciños e veciñas desta zona de Galicia que suma preto de 35.000 habitantes. Rueda, pola súa banda, amosou o seu interese por coñecer de preto, e de primeira man, os proxectos de futuro que marcarán o avance da Ribeira Sacra e a súa área de influencia.
O líder dos populares galegos reivindicou neste sentido as certezas que ofrece Galicia, á que definiu como unha “illa” dentro do contexto nacional. Lembrou a aprobación dos orzamentos autonómicos, e que na zona de Lemos, destacan “as partidas de máis de 30 millóns de euros para persoal do hospital de Monforte e de 1 millón de euros para o seu plan director de ampliación. Así mesmo, en materia de infraestruturas sobresae o investimento para a estrada entre Quiroga e Seoane do Courel, unha glorieta en Sober ou sendas peonís e ciclistas como a prevista en Pantón. O Goberno galego, tamén aquí, quere seguir investindo en estabilidade, nas persoas e no futuro”, sinalou Alfonso Rueda.
