A X Subida a Taboada terá un trazado similar ao da última edición, celebrada en 2006, cun percorrido de 2,7 quilómetros pola estrada autonómica LU-611, entre Rubián e Taboada. As dúas primeiras mangas disputaranse na tarde do sábado, con saídas ás 15.30 e 17.30 horas, e o domingo á mañá as dúas últimas, ás 11.00 e 13.00 horas. Na tarde do domingo entregaranse os trofeos aos gañadores. O parque pechado e as verificacións técnicas realizaranse na contorna da Praza de Riazón e na Avenida de Lugo.

A presentación da cita tiña lugar este mércores cos organizadores e colaboradores da proba, Escudería Taboada, Federación Galega de Automobilismo, concello de Taboada, Vicepresidencia da Deputación de Lugo e Xunta de Galicia.

O concelleiro de Deportes e Medio Rural de Taboada, Manuel Diéguez, explicou que “recuperamos a proba co mesmo espíritu e ilusión que a caracterizou no seu momento, e co obxectivo de que perdure nos vindeiros anos e volva ser un referente do deporte na comarca e repercuta de forma positiva na economía local” e convidou a asistir “a pasar unha fin de semana de montaña, disfrutando do deporte, da ribeira e da gastronomía de Taboada”.

A Subida a Taboada será a ultima proba do Campionato Galego de Montaña, a segunda na provincia, despois da Subida á Pontenova.

Subida a Taboada 2023 presentación / Delegación Territorial