O Partido Popular considera insuficiente o anuncio da adxudicación das obras de rehabilitación do firme da estrada N-540 tendo en conta que se dilata tres anos o remate das actuacións para a mellora da vía toda vez que o prazo de execución é de 38 meses desde o seu inicio previsto para outubro do 2024.
Deste xeito, dende o PP critican “o triunfalismo” exhibido esta semana polo delegado do Goberno, cando “é coñecedor e, por tanto, permitidor de que os seu presidente condene aos lucenses a convivir tres anos coa principal vía de conexión con Ourense e o AVE, ao que é imposible achegarse polas fochancas que rebentan rodas, palieres, amortiguadores, faros ou lunas”.
Pola súa banda Interior Galego Vivo considera “escandaloso e unha falta de respeito ao interior galego que dado o calamitoso estado da N-540 se actúe tan tarde e tan mal”. Consideran que a cantidade orzamentada é insuficiente para dotar da N-540 dun firme á altura da vía. “Resulta surrealista que non se licitaran as actuacións con carácter de urxencia e, no mellor dos casos, non comezará o investimento e as obras ata o 2025 .
Interior Galego Vivo apelaba a procurar solucións, que non poden prolongar o actual estado máis dun ano. “Non chegan 10 millóns para ampliar a N-540 cun aglomerado acorde á tonelaxe e ao tránsito da estrada; con redución de curvas nos piores tramos e carrís de adiantamento en todo momento cando menos nun sentido; e, como proposta de futuro deberíase facer unha intervención para a vertebración territorial real, que atendese tamén ao reto demográfico cunha mellora e ampliación incorpore un tren en paralelo que mellore a conectivade das comarcas”.
