Celia Díaz chega a Barcelona para vivir a experiencia de dar a coñecer as súas obras nun espectacular escaparate. Nada máis e nada menos que na concorrida e popular exaltación da literatura que supón a celebración de San Jordi para a sociedade catalá.

Estará, xunto con outras escritoras galegas, no posto que terá o Centro Galego de Barcelona na Rambla de Caputxins 35/37 a partir das 10:30 h.

Coñecida esta oportunidade que se lle presentou, aproveitamos para facerlle catro preguntas rápidas.

Como xurdiu a túa viaxe a Barcelona para estar no Sant Jordi?

Foi un amigo quen me puxo en contacto co Centro Galego de Barcelona para acudir á Diada de San Jordi representando a literatura galega. Estarei acompañada por outras escritoras galegas, as poetas Tamara Andrés, Sara Villar e Ánxela Lema. De maneira que entre todas achegaremos propostas dos tres xéneros: poesía, narrativa e teatro. Unha visión plural do panorama literario do noso país. 

É a túa primeira vez? 

Si, é a primeira vez e supón unha gran oportunidade para vivir en directo esta experiencia. 

Que libros levas para presentar ao público? 

Levarei varios libros de narrativa: “As faces do diamante”, “Corte e confección”, “Unha verdade amarga”, “A boca do monte” e “Rugando, o misterio do cuarto secreto”, todos eles publicados pola Editorial Galaxia. Tamén dous libros de teatro infantil: “Unha estrela para Amina” e “Velaí vai o papaventos”. Unha selección de obras dos dous xéneros que escribo decote. 

Onde estarás? 

Estarei no stand do Centro Galego de Barcelona, na Rambla de Caputxins 35/37 a partir das 10:30h.

Que idea levas do que representa Sant Jordi para a cultura e para a sociedade catalá?

Creo que o San Jordi é a gran festa da cultura catalá. Unha celebración da lingua e da literatura, tamén unha reivindicación da súa identidade.