Na Secretaría Xeral de Política Lingüística da Xunta de Galicia foron recibidos por D. Valentín García Gómez que manifestou o seu apoio á que será a primeira coroación canónica integramente en galego na diocese de Lugo.
O autor do cartel, D. Francisco Naranjo Beltrán, é un dos artistas mais prolíficos e celebrados na cidade de Málaga. A súas propostas, en contra do habitual, están cheas de significados e símbolos, e todo o reforza con figuras xeométricas, especialmente os círculos. Así o mestre Naranjo sempre pretende ir mais alá dun fiel retrato da Virxe e do Divino Infante. “A súa experimentación pictórica está enfocada a unha obra de influencias “Pop” con referencias á carteleira clásica. As cores planas, súas técnicas de experimentación serigráfica traducidas en pintura de cabalete, son os seus rasgos más distintivos”, apuntan os fregueses.
No presente proxecto empregou técnica mixta, tinta, acrílico e lapis de cor sobre táboa para executar esta obra. A paleta de cores resólvese en tons vermellos e azuis dando especial importancia ao branco.
O soporte orixinal da composición é unha táboa de 120 x 60 que ten como centro da súa composición a Nai de Deus sobre unha media lúa. No seu brazo dereito sostén o Neno que se estende sobre o seu peito e cóbreo cos brazos e coas mans. Mentres, a nai coa man esquerda sostén unha pomba dourada. Tanto a Virxe como o Neno visten túnica branca con bordes dourados e forro vermello. A túnica de María ábrese sobre o peito para aleitar. “Ademais viste un manto azul, esa cor significa a verdade divina, aquelo que é eterno e a inmortalidade do home. A Virxe leva o manto por ser raíña do ceo e da terra”, sinalan os fregueses.
Flanqueando a Nai de Deus encóntranse as Pampórnigas, unha parella de xigantes, de longos corpos e brazos. O home fuma en pipa mentres que a muller presenta a singularidade de levar colgando dos beizos un acio de uvas. Esta parella acompaña á Virxe na procesión da Ermida despois do Meco; figura que na composición contemplamos diante de María, de xeonllos
Os xigantes sosteñen coas súas mans as lenda “Rosa das rosas e Fror das frores, Dona das donas, Sennor das sennores”, a mesma que lucirá a Virxe dos Remedios no nimbo co que será coroada o 9 de setembro, e que corresponde coa primeira estrofa da Cantiga nº 10, das Cantigas a Santa María de Alfonso X.
Cartel coroación canónica da Virxe dos Remedios da Ermida
