Superadas as Festas Patronais, a vila de Quiroga encara outra celebración que se consolida no calendario na segunda quincena de agosto. Trátase do ‘Qui-Roma’, unha celebración na que se exalta o mundo romano con ambientación e unha chea de actividades de lecer e de recreacións nas que non faltarán as máis exitosas de cada ano como os desfiles e a loita de gladiadores no anfiteatro da Praza do Auditorio Municipal.
PROGRAMA
Pola mañá haberá unha ruta de cabalos a primeira hora, e ás 11:00 h. apertura do Mercado Qui-Romano na Rúa Real. A Praza do Auditorio, que será o escenario principal, acollerá tamén pola maña actividades creativas para os pequenos e pequenas podendo elaborar xoias, escudos e espadas. Para eles tamén haberá inchables de balde.
Como actividades divulgativas ofreceranse visitas guiadas aos Museos Xeolóxico e Etnográfico, dándolle un enfoque nos dous casos á cultura castrexo-romana.
Ás 11:30 h. haberá un primeiro desfile da ‘Guardia Romana Lucus Equites‘ pola Rúa Real, con remate e demostración na Praza Rúa Lago; e a partir das 12 horas a Batucada de Xoglares de Lemos amenizará a sesión vermú. Para os máis pequenos haberá paseos en Poni dende as 11:30 h.
Xa pola tarde, exposición dos bois do quirogués Mario Nogueira, e outras actividades de lecer e entretemento na Praza Rúa Lago como: escola de gladiadores para nenos e nenas, bingo romano, espectáculo de malabares con lume. Ás 19:00 h. un segundo desfile romano ambientará a rúa Real e ás 20:30 h. terá lugar o Gran Desfile Qui-Romano Arde Loucos. Este último terá como saída a Casa da Cultura e descorrerá pola Rúa Real ata a Praza do Auditorio desfilando a Guardia Romana Lucus Equites, os bois de Mario Nogueira e todos/as aqueles que queiran formar parte da comitiva.
Pola noite, ás 21:00 h. chegará o esperado espectáculo de recreación de loita de Gladiadores Qui-Romanos con Castrexos no anfiteatro da Praza do Auditorio. Ás 21:30 h. farase a cea popular con venda de tiques no Chapakuña 3 de Quiroga. A ambientación musical correrá a cargo do DJ Adri.
Como fin de festa está programado ás 23:00 h. un concerto a cargo do grupo de versións dos 80-90 Dinosaurios, de Monforte de Lemos, e a partir das 00:30 h. música coa discoteca móbil EME Music.
Organiza o evento o Concello de Quiroga en colaboración coa asociación Qui-Roma.
