Os mozos de Sober Diego Arias e Santiago González veñen de abrir o prazo de inscrición no I Torneo de Catán de Sober, un xogo de estratexia que estrearán nas festas da capitalidade, os días 13 e 14 de setembro.

O obxectivo do xogo é construír vilas, cidades e camiños sobre un taboleiro que é distinto en cada partida, mentres se van acumulando varios tipos de cartas que fan posible realizar diferentes construcións coas que conseguir puntos.

O primeiro xogador que chega aos dez puntos resulta o gañador e todos os semifinalistas e gañadores levarán un premio patrocinado polo Concello de Sober.

Segundo fontes do propio concello, a intención é que esta competición de estratexia se repita en adiante coincidindo coas festas da capitalidade.

INSCRICIÓNS

Será de balde e realizarase dende a páxina web: ttps://torneocatansober.wixsite.com/home, dende o correo electrónico torneocatansober@gmail.com ou a través da rede social ⁠Instagram: @torneocatansober

Para participar cómpre ter cumpridos os dez anos e, en caso de ser menor de idade, prégase a autorización dun titor legal cubrindo un formulario que será facilitado pola organización.