O Concello de Monforte continúa co seu ciclo de teatro correspondente ó segundo trimestre deste ano 2024, cunha nova actuación este domingo, 13 de outubro, no Edificio Multiusos a partir das 18:00 horas.
Kyoki, obra para maiores de 3 anos e público familiar, evoca múltiples situacións e personaxes que dun xeito ou doutro todas as persoas podemos recoñecer, a través dunha linguaxe xestual impulsada pola interacción constante co dispositivo escénico.
Kyoki significa “demencia” en xaponés e refírese a unha alteración da capacidade para recordar, pensar ou tomar decisións. É certo que adoita verificarse en persoas de idade avanzada, mais: quen nunca esqueceu onde colocou a caixa das galletas? ou por distracción vestiu o xersei do revés? ou saíu de casa atrasado para o cole sen peitear o cabelo?.
Kyoki retrata un deses días catastróficos, máis é tamén unha homenaxe a todas as persoas maiores que asisten cada día ó proceso implacable do declinio das súas capacidades vitais.
A seguinte obra do ciclo de teatro será O dragón de ouro, da compañía Sarabela Teatro, neste caso para público adulto. A cita o xoves, 17 de outubro, no Edificio Multiusos ás 20:15 h, sendo o prezo da entrada xeral de 5 euros e de 3 euros para estudantes, desempregados e xubilados.
