Álvaro Gómez, do club Escola Rosalía de Vigo e orixinario de Sober, foi profeta na súa casa acadando o título autonómico de bádminton en individual masculino tras derrotar na final ao seu compañeiro de dobres, Xoel Álvarez (CB As Neves). A serie gañadora foi 21-12/15-21/21-19 tras un encontro no que ambos exhibiron un alto nivel de xogo con grandes puntos que fixeron vibrar á bancada e ás autoridades presentes.

O vigués, de raíces soberinas, subiría novamente ao caixón pero esta vez como segundo na modalidade de dobres mixto xunto á coruñesa, Maia Freire (San Amaro). Caeron derrotados polos nevenses, Xulia Otero e Xoel Álvarez, en 3 xogos e tras máis de 40 minutos de partido e cun tanteo de 21-10/15-21/21-16.

A competición, segundo trasladan fontes do club, contou cunha gran afluencia de público que gozou do bádminton destas promesas que darán moi boas novas en breve, nos Campionatos de España Sub 13 que se celebrará en Granollers.