Antonio Lombardía, presidente do Consello Regulador da D.O. Ribeira Sacra, vén de reunirse co presidente da Deputación de Ourense, Luis Menor, para tratar diversos temas destinados a “fortalecer esta denominación de orixe”, considerada estratéxica para as dúas provincias. Durante o encontro, debatéronse accións centradas nas melloras para os produtores, na xestión e na promoción turística.
RENDIBILIDADE ECONÓMICA E CONSERVACIÓN DA PAISAXE
Un dos puntos da reunión foi deseñar estratexias para orientar a Denominación de Orixe cara a maiores niveis de rendibilidade e negocio, pero mantendo como prioridade a conservación da paisaxe. Neste sentido, os dous mandatarios falaron sobre como enfocar as accións en beneficio dos viticultores, adegas e do conxunto do territorio.
Pensando nos viticultores e nas adegas, e co obxectivo de impulsar a sustentabilidade do cultivo, coincidiron en promover a instalación de estacións meteorolóxicas, que permitirán obter datos clave para optimizar a produción; e tamén destacaron a necesidade de avanzar na dixitalización, tanto na xestión interna como nas interaccións coas adegas e viticultores adscritos, co obxectivo de modernizar os procesos e mellorar a eficiencia.
No ámbito do turismo, salientouse a importancia de reforzar a promoción e, en concreto, a Ruta do Viño da Ribeira Sacra, que se consolida como un elemento relevante dentro da oferta turística.
BOA SINTONÍA ENTRE CRDO RIBEIRA SACRA E DEPUTACIÓN DE OURENSE
Luis Menor reafirmou o compromiso da Deputación nestes ámbitos, subliñando que “estamos ante un sector absolutamente estratéxico para Ourense”. Pola súa banda, Antonio Lombardía destacou a colaboración institucional, sinalando a “boa sintonía entre o Consello Regulador e a Deputación de Ourense”.
Finalmente, Lombardía agradeceu ao presidente o seu interese pola D.O. Ribeira Sacra e a súa disposición a acompañar as novas políticas do Consello Regulador para traballar pola sustentabilidade da produción, a mellora da xestión, a promoción dos viños e a conservación da paisaxe.
