Como adoita facerse con outras causas sociais e humanitarias, o Concello de Monforte emprega a grandeza e simboloxía da súa Torre da Homenaxe para visibilizar o seu apoio. Neste caso trátase de conmemorar o Día Mundial da Sida e farao este domingo iluminándoa de cor vermello.
Cada Día Mundial da Sida versa sobre un tema diferente. Este ano o lema é “Sigamos o camiño dos Dereitos”, a través do que se reivindica que cos dereitos humanos no centro e as comunidades á vangarda, o mundo pode acabar coa SIDA como ameaza para a saúde pública para 2030.
Os avances substanciais que se fixeron na resposta ao VIH están directamente relacionados cos avances na protección dos dereitos humanos. Neste senso, a OMS fai un chamamento aos líderes e cidadáns de todo o mundo para defender o dereito á saúde corrixindo as desigualdades que dificultan o avance cara a fin da SIDA.
1 DE DECEMBRO, ‘DÍA MUNDIAL DA SIDA’
O Día Mundial da Sida foi o primeiro día dedicado á saúde en todo o mundo establecéndose no 1988. Desde entón as axencias das Nacións Unidas, os Gobernos e a sociedade civil reúnense cada ano para loitar en determinadas áreas relacionadas co VIH.
“O Día Mundial da Sida segue sendo tan importante hoxe como cando empezou, e continúa lembrando á sociedade e aos Gobernos que o VIH non desapareceu”, sinala o Alcalde monfortino. En 2024 calcúlase que hai no mundo 39,9 millóns de persoas con VIH, e que 1,3 millóns foron infectados. Calcúlase tamén cunhas 630.000 persoas morrerán por causas relacionadas co VIH en 2024.
A día de hoxe é fundamental aumentar o financiamento para a resposta á Sida. Tamén é esencial que a sociedade no seu conxunto tome conciencia de como o VIH afecta a vida das persoas e así poder poñer fin ao estigma e a discriminación, acadando mellorar a calidade de vida das persoas que viven co VIH.
