Antom Fente, voceiro de Por Chantada-IGV, manifestaba satisfacción pola unión de todas as forzas en instar á Consellaría de Sanidade da Xunta de Galicia a cumprir coas demandas da Valedora do Pobo a instancias da Plataforma veciñal Chantada Quere Sanidade (solucionar os problemas de cobertura de prazas, dotar de mecanismos de información ás persoas doentes das opcións ante as dificultades de acceso á atención sanitaria por mor da falta de persoal); a dotar ao PAC dunha segunda equipa; a impulsar a hospitalización no fogar (HADO) en Chantada, sendo con Quiroga as últimas comarcas da provincia sen iste servizo.
Solicitarase tamén o vado do aparcadoiro e o arranxo da porta do aparcadoiro do centro de saúde; o cese da política de desmantelamento e feche de servizos do hospital comarcal de Monforte, dotándoo do persoal necesario en cada categoría e contratando as/os especialistas necesarios; a publicación das listaxes de espera ocultas – non estruturais – acometendo un plano de redución das listaxes de agarda e tempos de demora; e a desenvolver os instrumentos de participación social na sanidade, pondo en marcha o Consello de Saúde da Galiza e os Consellos de Saúde de Área Sanitaria.
Se ben as prazas de especialidades concretas a cubrir que refería de xeito específico a moción inicial eran as demandadas por persoal sanitario e sindicatos, estima Fente que a súa concreción “era unha cuestión menos importante que conseguir o apoio de toda a corporación e o conseguinte reforzo destas demandas ante a Xunta de Galicia. A emenda do Partido Popular era asumíbel e non mudaba o groso da moción, polo que non dubidamos en aceptala se con iso saía adiante”.
