O Esmorga Fest, a cita que reúne a todos os amantes da música indie e underground fóra das datas de verán, volve un ano máis a Sarria.

Nesta nova edición, o festival celebra o décimo aniversario dunha cita que se iniciou como unha festa de aniversario duns amigos na que actuaban diferentes bandas e que, co paso do tempo e con esforzo e dedicación, chegou a grandes niveis de repercusión e convocatoria.

DATAS DO FESTIVAL E PRIMEIRAS CONFIRMACIÓNS DE BANDAS

O 17 e 18 de outubro de 2025 serán as datas de celebración do evento e o vindeiro 22 de maio ás 11.00 horas anunciaranse as primeiras bandas confirmadas a través da web e redes sociais do festival. Tamén sairán á venda os abonos, cunha primeira oferta que, segundo manifestan dende a organización, “á vista do acontecido nos últimos anos, é probable que se esgoten en moi pouco tempo”.