Desde o ano 2021, o grupo socialista de Pantón vén reclamando melloras na atención sanitaria e esixindo que se reforce o persoal médico en Pantón. E desde hai máis dun ano advirten de que os planos do futuro centro de saúde recollen só dúas prazas de medicina familiar e comunitaria, “alertamos en numerosas ocasións de que a realidade do proxecto non se correspondía coas promesas do Partido Popular. É indignante que se fixese campaña cunha mentira que agora queda ao descuberto”, engaden.
Os socialistas aseguran que a confirmación oficial chegou o pasado 30 de xuño, coa publicación na web do SERGAS do plan funcional do futuro centro de saúde, que contempla dúas consultas médicas, dúas de enfermaría, unha sala polivalente, unha de técnicas e unha de mostras. “En ningún punto se menciona a terceira consulta prometida reiteradamente pola Xunta e polo alcalde, malia que Pantón conta con 2.099 tarxetas sanitarias asignadas”, apuntan.
“O tempo danos a razón: o Partido Popular vendeu fume en campaña electoral e agora queda claro que a súa promesa non se vai cumprir. A Xunta recoñece por escrito que o novo centro terá só dúas prazas médicas, polo que pedimos explicacións inmediatas”, afirma o grupo municipal socialista.
O PSdeG de Pantón esixe á Xunta de Galicia que rectifique e modifique o proxecto para garantir a terceira consulta médica comprometida, e solicita ao alcalde que dea conta pública deste novo engano. “A sanidade non pode ser unha moeda de cambio nin unha promesa que se leva o vento. A veciñanza de Pantón merece unha atención sanitaria digna, axeitada á súa poboación e necesidades”, conclúen.
