A formación socialista alerta de que non houbo ningunha explicación pública sobre o motivo do peche, que afecta directamente a gandeiros, carniceiros e á economía da vila. “Só sabemos que o matadoiro está pechado. Non se nos comunicou nada, nin en pleno nin por ningunha outra vía. Se se pecha unha instalación pública, o mínimo é dar explicacións á cidadanía”, afirma o voceiro socialista, Benjamín Escontrela.

Os socialistas sinalan que, entre os rumores que circulan, fálase dunha posible avaría na caldeira, a mesma escusa empregada no pasado, ou dun suposto permiso vacacional ao persoal. “Pero todo son especulacións. O que reclamamos é transparencia, responsabilidade institucional e un mínimo de cortesía democrática”, subliña Escontrela.

O PSdeG advirte do grave impacto económico e social que implica este peche, especialmente nestas semanas de verán nas que Sarria duplica ou triplica a súa poboación pola chegada de visitantes.

Apuntan que a súa preocupación medra despois de que a Consellería do Medio Rural anunciara, no mes de novembro, unha reunión co Concello na que se ofreceu apoio económico para manter o servizo municipal. “A documentación, polo que sabemos, foi enviada recentemente polo Concello, pero descoñecemos en que punto se atopa a tramitación”, engaden.

Os socialistas insisten en que o matadoiro debe seguir sendo de xestión pública e esixen ao alcalde que ofreza explicacións inmediatas. “Se continúa este intolerable silencio, iniciaremos todas as vías necesarias para reclamar a súa reapertura. Xa estamos en contacto co BNG e o PP para solicitar de forma conxunta a celebración dun pleno extraordinario que obrigue ao goberno a dar conta do que está a ocorrer”, conclúe Escontrela.