O sindicato advirte á Consellería que de persistir co incumprimento do acordo asinado na Mesa Sectorial en 2023 relativo á xornada de 35 horas, verase obrigado a recorrer á vía xudicial. CSIF lamenta que, “a pesar das reiteradas reclamacións, a Administración non deu resposta”, polo que lle fixeron un novo emprazamento, advertindo de que a situación está a xerar desigualdades entre profesionais e áreas sanitarias.

“Actualmente, só o persoal con quendas rotatorias complexas ve correctamente contabilizadas as súas horas, mentres que os traballadores con quendas fixas de mañá ou tarde superan a xornada anual pactada de 1.533 horas. Esta situación vulnera dereitos laborais e afecta directamente á conciliación familiar e persoal”, insisten.

O sindicato insta ao SERGAS para actuar con urxencia para garantir un cómputo uniforme e transparente en todas as áreas. “Estamos ante un incumprimento prolongado que prexudica tanto os dereitos como a conciliación dos profesionais. Esiximos solucións inmediatas para evitar agravios entre traballadores”, conclúen desde a Central Sindical.