A atención presencial préstase desde a oficina situada na rúa Rolda das Mercedes, 14, na capital da provincial, punto de referencia para as persoas que buscan apoio no seu acceso ao mercado de traballo.
O balance anual pon de manifesto un mercado laboral condicionado pola baixa e media cualificación dos postos máis demandados, a persistencia de estereotipos de xénero, a fenda dixital entre xeracións e as dificultades de integración laboral da poboación inmigrante. A maioría das persoas atendidas acudiu ao servizo cos seus obxectivos profesionais claramente definidos, orientados de forma predominante cara a ocupacións de baixa ou media cualificación. Aínda que existen postos solicitados indistintamente por mulleres e homes —como comercio e hostalería (dependente, caixeiro-reponedor ou pique de cociña)—, a análise das atencións reflicte con claridade a segmentación do mercado de traballo por sexo.
Unha parte importante das mulleres centra a súa procura no sector servizos, especialmente en ocupacións como limpeza, emprego do fogar ou coidados de persoas dependentes en domicilios ou institucións, mentres que os homes oriéntanse maioritariamente cara a construción, agricultura, gandería, industria ou transporte, en postos como peón da construción, peón agrario ou gandeiro, operario de produción ou mozo de almacén.
Neste contexto, a Fundación advirte dunha falta estrutural de persoal no sector gandeiro, onde numerosas vacantes non chegan a cubrirse a pesar da demanda existente. Esta situación explícase, en boa medida, pola escaseza de perfís cualificados, barreiras lingüísticas dos escasos/as candidatos/as ou pola dificultade para atopar persoas coa formación adecuada para estes postos, o que repercute directamente no funcionamento do sector.
Outro dos aspectos máis relevantes detectados polo equipo de orientación é a brecha xeracional no uso das canles de procura de emprego. As persoas de maior idade recorren principalmente a contactos persoais e redes informais como vía de acceso ao emprego, mentres que as persoas mozas utilizan maioritariamente ferramentas dixitais, como portais de emprego e redes sociais. Resulta significativo o número de persoas maiores de 50 anos con escasas competencias dixitais e unha clara reticencia a adquirilas, en moitos casos por non dispoñer de computador no fogar ou por utilizar o teléfono móbil unicamente para chamadas.
O colectivo inmigrante constitúe o grupo máis numeroso entre as persoas atendidas en Lugo. Aínda que parte deste colectivo conta unicamente con estudos básicos no seu país de orixe, destaca o elevado número de persoas que chega con formación académica ou profesional que non foi homologada en España. A iso súmase a falta de competencias en lingua galega, outro dos principais obstáculos para a inserción, polo que desde a Fundación facilítase información sobre accións formativas gratuítas, recursos da oficina de emprego e certificacións lingüísticas.
A maioría destas persoas procede de países latinoamericanos, como Venezuela, Cuba ou Colombia. Ao longo do ano, a Fundación Amigos de Galicia desenvolveu en Lugo itinerarios de orientación individualizada, con acompañamento na procura activa de emprego e accións de mellora da empregabilidade adaptadas ás necesidades de cada perfil. Para 2026, a entidade continuará reforzando o seu servizo de orientación laboral na provincia, con especial atención á mellora das competencias dixitais, a igualdade de oportunidades entre mulleres e homes e o apoio aos procesos de homologación e formación lingüística, co obxectivo de facilitar unha inserción laboral máis estable e acorde aos perfís profesionais das persoas atendidas
