O Concello de Sarria vén de presentar unha nova edición do seu evento estrela de inverno, a “Festa do Cocido de Porco Celta”. Trátase dunha xornada gastronómica moi esperada pola veciñanza na que ademais de socializar ponse en valor e dáse a coñecer a saborosa carne de porco celta. Para a reserva de mesas, o concello lembra que será necesario chamar ao teléfono 982 535 000.
A presentación oficial, este venres 16 de xaneiro na vila de Sarria, contou coa presenza –entre outros– do Alcalde de Sarria e parte do Equipo de Goberno local; a directora territorial da Consellería de Emprego, Comercio e Emigración, Carmen José López; e da xefa provincial de Turismo, Paloma Vázquez. Ambas representantes autonómicas destacaron a importancia da convocatoria, que reúne cada ano a centos de persoas arredor deste produto autóctono.
A celebración chega á súa 18ª edición, terá lugar o 31 de xaneiro, e conta cunha nova imaxe gráfica promocional encargada ao deseñador local Borja Doel. Ademais, anunciouse que terá un pregoeiro de altura: Fernando Romay.
PROMOCIÓN DO PORCO CELTA
A Xunta de Galicia renova a súa colaboración económica coa festa e lembra que colabora tamén no fomento da raza a través dun convenio coa asociación de criadores Asoporcel, renovado o pasado mes de setembro cunha contía de 436.850 euros ata o ano 2027. O obxectivo da administración autonómica é continuar coas actividades de recuperación e conservación do porco celta, e nese senso lembra a existencia de axudas da Consellería do Medio Rural para a creación ou mantemento dos libros xenealóxicos e as actuacións derivadas dos programas de cría.
