O alcalde de Monforte , José Tomé Roca, asistiu ao encontro acompañado polos Concelleiros de Deportes, José Manuel Mougán, e de Muller e Igualdade, Margarita López, así como dos presidentes do Club Lemos, Antonio López, e do CF Ourense, Camilo Díaz, ademais doutros membros das directivas de ambos clubs e representantes do Concello de Ourense. Antes do inicio do partido, gardouse un minuto de silencio en memoria das vítimas do accidente ferroviario de Adamuz.
Este encontro correspondente á xornada 21 do Grupo A de Primera Federación tivo lugar nas instalacións monfortinas a petición do Ourense CF, xa que o campo do Couto, na cidade das Burgas, atópase actualmente en obras para a renovación do céspede. “Acoller este partido no estadio de A Pinguela demostra que temos unhas excelentes instalacións deportivas, perfectamente aptas para a celebración de partidos de primeiro nivel como este, que cumpre coas esixencias da Federación Española de Fútbol”, indicou José Tomé.
En agradecemento a esta colaboración, o presidente do CF Ourense, Camilo Díaz, e o Director Xerente do equipo, Javier Quiroga, entregáronlle ao Alcalde monfortino e ao Presidente do Club Lemos, senllos trofeos conmemorativos deste partido.
A celebración deste encontro supón tamén unha importante proxección para Monforte, xa que todos os partidos da Primera Federación son televisados. Ademais, o partido foi seguido por un numeroso público afeccionado desde as gradas da Pinguela. As entradas vendéronse a 15 euros para o público xeral e 10 euros para os socios do Club Lemos, mentres que os abonados do Ourense CF accederon co seu carné de socios. A recadación foi a favor do Club Lemos.
