A suspensión do desfile de comparsas e disfraces individuais de Quiroga fará posible que aínda se poda anotar máis xente pois a organización informa que o prazo de inscrición para participar no concurso-desfile de comparsas estará aberto ata o xoves 19 de febreiro.
O desfile sairá ás cinco da tarde dende a rúa Piscinas para percorrer a rúa Real ata a Casa Consistorial onde rematará cun baile de disfraces animado cunha charanga e unha invitación a chocolate con churros.
PARTICIPACIÓN
No concurso poden participar todas as persoas que o desexen, tanto deste Concello de Quiroga coma doutros, sempre e cando se acollan as dúas modalidades de participación estipuladas: a Modalidade comparsa (integrada polo menos por dez membros) e a Modalidade disfrace individual (que como máximo agrupará tres membros por disfrace).
Cada participante nomeará un representante para formar parte do xurado, polo que o xurado cualificador estará composto por tantos membros coma comparsas e disfraces participen no desfile. Os integrantes do xurado despois de asistir ao desfile, valorarán cada comparsa menos á que representa. Terase en conta para dita valoración a orixinalidade dos disfraces, a coreografía, a escenografía, a elaboración de vestiario e a elaboración da carroza.
PREMIOS
Para a modalidade de comparsa establécese un primeiro premio de 600 €, un segundo premio de 400 € e un terceiro premio de 300 €. O resto das comparsas participantes recibirán 100 €.
Para a modalidade de disfrace individual haberá un único premio ao mellor disfrace dotado con 60 €.
O Concello de Quiroga informa que os premios estarán suxeitos ao disposto na Lei 35/2006, do 28 de novembro, do Imposto sobre a Renda das Persoas Físicas, e que serán entregados na rúa Real, diante do Concello, ao remate do desfile. E lembra que para participar no desfile é preciso inscribirse, presentando a documentación esixida, na Casa da Cultura ou na Sede electrónica do Concello de Quiroga onde tamén se poden consultar as bases e a documentación requirida.
