O Pleno do mes de maio do Concello de Monforte augúrase longo e intenso. Dende as formacións políticas do PP, BNG e os concelleiros non adscritos, teñen programadas unha ampla batería de preguntas e rogos dignos dos padales máis famélicos de información.
Dende o PP, Julia Rodríguez pediralle ao Alcalde que se cumpra o contrato con Aqualia nos termos acordados, pois consideran que, “non nos podemos fiar do alcalde, nin do seu baile de cifras, nin das súas propostas surrealistas”. Dende a súa formación aseguran que o rexedor nunca tivo vontade real de reclamarlle á concesionaria da auga o que debían. Por outra banda, tamén teñen previsto preguntarlle ao rexedor pola ubicación da canceira que se vai construir na comarca e que recentemente anunciou a Deputación de Lugo posto que ninguén anunciou o lugar.
Pola súa banda, o BNG ten programado levar a pleno a limpeza do Río Cabe na zona da Pinguela. Dende a súa formación consideran que a auga putrefacta, os mosquitos e roedores de gran tamaño, supoñen un perigo para a poboación dende que en 2016 rompera a presa da Pinguela. Nesta reunión tamén solicitarán que se tomen medidas para paliar o problemas das especies exóticas invasoras no río da cidade.
Finalmente, o grupo de concelleiros non adscritos, e gardando relación cos últimos casos de curriculos falseados na política nacional, van solicitar que o goberno de José Tomé Roca publique na páxina web do Concello o expediente académico e profesional de todos os integrantes da corporación municipal en aras de transparencia.
Con todas estas preguntas programadas por parte da oposición, presúmese que o Alcalde vivirá un Pleno onde vai ter que dar moitas respostas.
