A Fundación San Rosendo prepara a apertura da súa residencia en Ferreira de Pantón coa chegada dos primeiros residentes en abril. O novo centro ofrecerá coidados especializados a 36 usuarios, e o persoal irase incorporando de forma paulatina, adaptándose á chegada dos residentes para garantir un servizo próximo e de calidade desde o primeiro día.
José Luis Gavela, presidente da Fundación San Rosendo, sinalou que “esperamos dar a benvida aos primeiros residentes de Ferreira de Pantón tras a Semana Santa”. Ademais, recalcou que esta apertura “consolida o noso compromiso de ofrecer atención de calidade en contornas modernas e acolledoras”. Cando a residencia estea completa, xerará 20 empregos directos na comarca.
A Fundación San Rosendo dispón de 73 centros asistenciais en Galicia: 59 para persoas maiores, 11 para persoas con discapacidade, un para o tratamento do alcoholismo, un centro de inclusión e unha escola infantil. En total suman 3.919 prazas das que o 24,9% son concertadas. O equipo de profesionais ascende a 2.378 traballadores, un 4,6% máis que o ano anterior.
