A Asociación Micolóxica Os Lactouros organiza unha nova edición das súas Xornadas Micolóxicas, que se desenvolverán en Monforte de Lemos os vindeiros 3, 4 e 5 de decembro, cun programa de actividades que combina divulgación científica, formación práctica, contacto coa natureza e gastronomía.

As xornadas teñen como principal obxectivo achegar o coñecemento dos cogomelos á cidadanía, fomentar o respecto polo medio natural e promover unha recollida responsable e segura, ao tempo que se crea un espazo de encontro para todas as persoas afeccionadas á micoloxía.

As actividades comezarán o xoves 3 de decembro, ás 20:00 horas, no Centro do Viño Ribeira Sacra, cunha charla impartida por María Cabaleiro, presidenta da Federación Galega de Micoloxía, sobre os principais cogomelos comestibles da Península Ibérica. Unha oportunidade para coñecer mellor algunhas das especies de maior interese gastronómico.

O venres 4 de decembro, tamén ás 20:00 horas no Centro do Viño, celebrarase un obradoiro práctico de autocultivo de cogomelos. As persoas participantes aprenderán a preparar o seu propio kit de cultivo, que posteriormente poderán levar para a casa. Esta actividade contará cun máximo de 35 prazas.

A programación continuará o sábado 5 de decembro, ás 10:00 horas, cunha saída micolóxica guiada ao monte, na que as persoas asistentes poderán aprender a identificar diferentes especies de cogomelos da man da micogalega Plantae. O punto de encontro será nas Casitas da Compañía.

Como peche das xornadas, ás 14:30 horas, celebrarase o tradicional Xantar Lactouro no restaurante Abadía San Simón, cun menú elaborado a base de cogomelos.

Divulgación, natureza e convivencia

Dende Os Lactouros salientan a importancia de continuar promovendo este tipo de iniciativas, que permiten poñer en valor a riqueza micolóxica dos nosos montes e contribuír á sensibilización sobre a conservación dos ecosistemas.

A asociación lembra tamén que a identificación correcta das especies é fundamental para evitar intoxicacións, polo que considera especialmente importante fomentar a formación e o asesoramento de persoas con coñecementos especializados.

Ademais da súa vertente formativa, as xornadas pretenden ser un punto de encontro entre persoas que comparten o interese pola natureza, a micoloxía e a gastronomía, reforzando unha actividade que conta cunha importante tradición na comarca de Lemos.

Para participar nas actividades que requiren inscrición previa, as persoas interesadas poden contactar coa organización no teléfono 671 473 982. As xornadas están organizadas pola Asociación Micolóxica Os Lactouros e contan coa colaboración do Concello de Monforte de Lemos e da Vicepresidencia da Deputación de Lugo.

Dende a asociación animan a toda a veciñanza de Monforte e da Ribeira Sacra a participar nesta nova edición e descubrir, aprender e gozar dun dos recursos naturais máis singulares dos nosos montes.