A portavoz nacional, Ana Pontón, comprometeu o traballo do BNG en Madrid para reforzar Monforte como nó ferroviario estratéxico, tanto para o transporte de persoas como de mercadorías, aproveitando esa posición para impulsar a actividade económica e o emprego na comarca.
Recuperar trens nocturnos, activar as cercanías e reforzar o transporte de mercadorías son algúns dos compromisos plasmados na Axenda Galega do BNG. Pontón apostou ademais por establecer a conexión ferroviaria co porto seco de Monforte, “un bo exemplo do abandono gubernamental tanto por parte da Xunta, que non acaba de urbanizar e dotar de servizos a futura plataforma loxística, como do Estado, que non fai as conexións co ferrocarril nin coa N-120.”
O BNG defenderá tamén en Madrid ampliar as actuacións no corredor A Coruña-Lugo-Monforte, sen novos atrasos; modernizar as conexións ferroviarias, incluída a liña Ferrol-Ribadeo, e unha conexion ferroviaria directa entre Santiago e Lugo; completar o Corredor Atlántico no eixo Ourense-Monforte-Lugo e no tramo León-Monforte.
A portavoz nacional concluíu pedindo aos galegos e as galegas o apoio ao BNG para que Galiza se faga respectar en Madrid, no caso de Lugo da man de Olalla Rodil. A cabeza de cartel por Lugo explicou que o BNG escolleu precisamente como escenario neste primeiro día de campaña, a estación do ferrocarril de Monforte “para deixar claro que unha das súas prioridades políticas é mellorar a conectividade e a cohesión territorial, reforzando as comunicacións na provincia.”
Na mesma liña que Pontón, Rodil destacou o traballo feito na pasada lexislatura polo único deputado do BNG en Madrid para iniciar as obras de modernización e de electrificación fa vía que conecta Lugo con Ourense. “Agora están en probas, pero aínda queda moitísimo por facer para garantir que Lugo este conectada por tren como se merece e como necesita”, apuntou a candidata, aludindo expresamente á necesidade de recuperar frecuencias perdidas . “A xente que vivimos e traballamos nas comarcas de Lugo merecemos un servizo de tren á altura das necesidades da veciñanza e do século XXI”, concluíu.
