Martín Alemparte, coordinador da candidatura de Xeoparque Mundial da UNESCO Montañas do Courel, explícanos en que consisten as xornadas que se van a celebrar en Quiroga por mor desta candidatura á vez que manifesta as súas inquedanzas e necesidades ante este proxecto.
Cal é a finalidade das xornadas que tedes programadas sobre o Xeoparque Montañas do Courel?
Dar a coñecer e poñer en valor todo o que temos na zona. Dende fai 15 anos traballamos constantemente para poñer en valor o que a natureza brindou ó interior da provincia de Lugo pero non foi ata agora, ca candidatura a xeoparque, cando realmente a xente viu todo o que realmente tiña.
Queremos que todos aqueles que non son da zona saiban o que realmente hai. É máis, as xornadas comezan o luns 20 explicando que é o noso patrimonio xeolóxico, para que serve, onde atopalo e as diversas variantes nas que está presente a xeoloxía. Temos a intención de explicar dun xeito ameno e sinxelo para que ninguén marche con dúbidas. Para todo isto tamén están presentes Enríque Díaz Martínez do Instituto Xeolóxico e Mineiro de España e a Daniel Ballesteros, investigador da universidade francesa e membro do comité científico do Proxecto de Xeoparque Montañas do Courel.
Ademais, imos presentar de xeito oficial a guía Las Montañas del Courel: una geología muy humana. Aínda que está feita para cando viñeron os avaliadores da UNESCO ó Courel, imos aproveitar para facer unha presentación oficial da obra.
A segunda xornada, programada para outubro, vai ser unha continuidade e ampliación desta primeira. Pretendemos que a xente coñeza a zona ben e dun xeito ameno e divertido.
Como inflúe a xeoloxía na zona?
Inflúe en moito máis do que nós pensamos. Hai que ter en conta ca composición do chan dunha zona é a súa riqueza. A parte do clima, a xeoloxía é todo. Por iso, nesta primeira xornada, hai unha cata de viños xeolóxica. Dependendo da composición do chan, os caldos acadan uns matices ou outros que lles dan un sabor e textura totalmente diferentes. A nosa riqueza basease nas rochas da zona.
Que valoración fas da visita dos avaliadores da UNESCO?
Moi boa. Sabían moi ben ao que viñan e o que tiñamos. Cando eles participan neste tipo de candidaturas, saben perfectamente as características da zona. É máis, dentro dos 9 apartados a avaliar durante a súa visita, un dos puntos é a xeoloxía e soamente ten un 5% de peso no total da puntuación. Na súa visita sobre todo o que valoran é a xestión de medios, recursos, financiación a longo prazo, turismo e estrutura, entre outros, para que o Xeoparque cumpra con todas as regras que debe ter para ser declarado como tal.
Sería moi arriscado afirmar que imos obter a candidatura a primeira vez que nos presentamos porque aínda queda moito traballo por facer. Hai que pensar que aquí os concellos teñen presupostos anuais e sen embargo, dende a UNESCO pídenos a 4 anos. Aínda cos concellos de Quiroga, Ribas de Sil e o Courel están unidos nesta causa, non poden confirmar presupostos a tanto tempo. E logo están as diferentes administracións nacionais. Hai partidas que dan as Deputacións, outras o goberno central, hai convenios que se firman cun só organismo,mantemento das estrutura…é complicado tanto buscar financiación como poder presentar en firme un proxecto con todo os requisitos.
Que opinión ten a xente do proxecto a nivel local?
Ó principio eran reacios ó tema porque escoitar Xeoparque e xa se pensaba en restricións pero pouco a pouco fóronse dando conta da relevancia que ten isto. Non fai falta dicir que os nativos da zona saben dende fai moito a riqueza que posúen pero a denominación de Xeoparque, ó principio, era extrana.
E a nivel provincia, temos coñecemento da riqueza do Courel?
Non, aí somos uns completos descoñecidos. Si é certo que ca visita dos avaliadores da UNESCO coñecéusenos un pouco máis. Os medios fixeron moita labor de dar a coñecer o proxecto pero aínda queda moito camiño que percorrer.
