A Xunta publicou este xoves no Diario Oficial de Galicia (DOG) o acordo da aprobación do proxecto de trazado para a restitución da estrada LU-651 en Folgoso do Courel.

A actuación, á que a Administración autonómica destinará 5,2 millóns de euros, céntrase nas obras necesarias para a reposición desta vía autonómica, entre os puntos quilométricos 17+650 e 18+470, no tramo afectado polo afundimento de varias galerías dunha explotación mineira e o derrube posterior da ladeira.

Tras o afundimento, a Xunta executou unha actuación de emerxencia para habilitar o acceso provisional a Folgoso do Courel, no que investiu un millón de euros, mentres avanzaba na definición da solución definitiva que foi aprobada este xoves.

A intervención definitiva, que se executará por fases, inclúe un novo trazado que ocupará parte da zona derrubada, despois de estabilización da ladeira.

En concreto, o novo trazado realízase a media ladeira, xa que permite reconstruír a estrada co máximo coidado ambiental, evitando a afección á Rede Natura e reducindo o movemento de terras, o que implica maior seguridade viaria.