O vicepresidente da Deputación de Lugo, Efrén Castro, e o presidente da Federacion Galega de Ciclismo, Juan Carlos Muñiz, presentaron as etapas na rúa Maior de Sarria.
Nesta vixésimo segunda edición, con outras dúas etapas en distintos puntos de Galicia (Xinzo de Limia e Sanxenxo) participan 112 ciclistas de 16 equipos.
A primeira etapa da Volta a Galicia, o 12 de setembro, será unha contrarreloxo individual con saída na rúa da Liberdade e chegada na rúa Maior (fronte á Igrexa de San Salvador), e un percorrido de 7,1 quilómetros pola vila e a contorna da localidade. A proba comezará ás 18.00 horas.
O trazado deseñado para o 13 de setembro, segunda etapa da Volta a Galicia, con chegada e saída na rúa da Liberdade, conta con 160 quilómetros nos que os ciclistas percorrerán tamén outros concellos das comarcas de Sarria e Lugo como Samos, Láncara, O Páramo, O Corgo, Castroverde, Baralla e Lugo (Nadela). A proba iniciarase ás 12.00 horas cunha saída neutralizada.
Trátase dun itinerario de media montaña con terreo bastante rápido e rompepernas, con Montán (Samos) e Sobrado (Baralla) -portos de terceira categoría- como puntos máis altos do circuíto.
Efrén Castro explicou que “desde a Vicepresidencia da Deputación de Lugo renovamos o apoio á Volta a Galicia, apostando de novo polo ciclismo como plataforma para amosar a riqueza natural e patrimonial e dinamizar económica e socialmente Sarria e o resto da comarca e do interior de Lugo, pola loxística e o público que trae consigo”.
Tamén destacou a relevancia deportiva da proba para ciclistas que aspiran a unha carreira deportiva profesional. Neste sentido subliñou que “o apoio á proba pretende contribuír ao fortalecemento dunha estrutura deportiva – unha rede de clubs, competicións e público- que fomente a práctica desta modalidade e que ofreza aos ciclistas e ás ciclistas do país un itinerario de crecemento competitivo”.
A Vicepresidencia da Deputación de Lugo achega 12.000 euros para a organización da etapas lucenses da Volta a Galicia, un escaparate para ciclistas das categorías Elite e Sub 23, que preparan o salto ao ciclismo profesional.
