A mostra vense de inaugurar en Lorient, Francia, coa presencia do Conselleiro de Cultura e Turismo, Román Rodríguez. Na inauguración da exposición, que se enmarca nunha das actividades da 49ª edición do Festival Intercéltico que este ano celebra o Année de Galice, o conselleiro resaltou o “carácter multicultural” do Camiño de Santiago, que recibe peregrinos de preto de 180 países .
A mostra composta por 20 imaxes recolle algúns dos valores asociados á peregrinación a Santiago como a natureza, o patrimonio artístico, as cidades, as paisaxes e os roteiros xacobeos. E tamén a convivencia, o encontro, o esforzo ou a mestura de culturas. Manuel Valcárcel leva anos fotografiando a filosofía asociada ao Camiño de Santiago.
No Festival francés cóntase coas actuacións da banda de música de Silleda, a banda de gaitas de Forcarei, artistas como Josele e Begoña Lorenzo, o grupo de baile Xirandela, as pandereteiras Bouba, Suso Vaamonde e Davide Salvado. Desde a Xunta definen o evento como un reto na promoción da música e danza galega e aseguran que “contribuirá a difundir a identidade e a cultura da comunidade para o próximo Xacobeo 21”.
