O Museo Pazo de Tor comezaba o venres, 14 de xullo, unha ampla programación para esta segunda quincena do mes. Dentro da programación expandida da RMPL (Rede Museística Provincial de Lugo), coa que os museos ábrense a iniciativas que parten do territorio, o Museo Pazo de Tor acollía unha nova edición do Sacra Festival.

A cita contou coa visita da nova deputada de cultura, Iria Castro, que asistiu ao espectáculo de danza inclusiva Distopía de Compañía 5S, e ás actuacións de Alberto Cernadas, Allova ou Sila Lua que formaban parte do Sacra Festival. A deputada abría así a rolda de visitas aos museos da RMPL, “Alégrame que iniciara o seu mandato achegánsose a Tor, que viñera a coñecer os novos proxectos museolóxicos, Soterradas ou a exposición a Historia do Futuro. Todo Tor e todos os proxectos que temos aquí en marcha e que espertaron o seu interese”, sinala Encarna Lago, xerente da RMPL.

Entre as próximas citas no Museo Pazo de Tor destaca o campamento infantil que se desenvolverá do 20 ao 21 de xullo en horario de 10:00 a 13:00. Coñecerán o territorio a través do mapa de Fontán e celebrarán a actividade “Corporízate na RMPL”. O taller traballará o desenvolvemento de linguaxes corporais dende as artes escénicas, clown, danza contemporánea inclusiva e o ioga. As inscricións no correo concertacionsrmp@gmail.com

Do 18 a 19 de xullo desenvólvese o obradoiro “Pazo con todxs”. A asociación Agora participa desta proposta que pretende xerar un espazo de benestar destinado ao coidado de relacións comunitarias a través da risoterapia e o xogo no museo.