Santuario da Nosa Señora de Cadeiras – Historia – Arquitectura – Tradición, foi coordinado por José María Lago, conta cunha contextualización histórica, do propio Lago, coa transcrición dos documentos orixinais sobre os milagres que a finais do século XVIII se relataron para solicitar limosna para o santuario.
A historiadora da arte, Saleta López, achega a visión arquitectónica e artística, mentres que Alfonso Campos traslada as tradicións contadas pola propia veciñanza e o párroco, Ramón Piñeiro Campos, reflexiona sobre a devoción popular. Todos eles participarán na presentación, que terá lugar en Cadeiras este venres ás 20:00.
O libro conta con fotografía a toda cor, algunhas antigas facilitadas por veciñanza da zona, e ten un prezo de venta de 15 €. Pódese adquirir na páxina web www.proencialibros.com da Libraría da Proencia, ademais de no propio acto de presentación ou na vindeira Feira da Rosca de Sober, o 12 de agosto, ou no propio día da romaría de Cadeiras, o 8 de setembro, lugares onde haberá stand da libraría, ademais de poder pedilo en librarías de Monforte.
