As Foliadas Guímaras, unha iniciativa do Concello da Pobra do Brollón en colaboración coas asociacións veciñais das parroquias, están a dinamizar o rural descentralizando a programación cultural e fomentando a tradición musical do municipio.

Este sábado 26 celébrase unha nova edición no local social da parroquia de Piño ás 20:00 horas. Primeiro está programada unha presentación literaria, e despois do caldo comunitario haberá unha foliada.

PRESENTACIÓN LITERARIA E FOLIADA

Xurxo Souto, escritor, narrador e músico, presentará o seu novo libro, Somos un pobo de artistas. O método Luísa Villalta (Xerais, 2024). Na obra, Souto defende a relación entre poesía e música ao longo da historia ademais de rescatar importantes figuras da música popular.

Tras a presentación, e antes de dar paso á foliada, a Asociación veciñal de Piño ofrecerá un caldo comunitario, para o que dende a organización instan aos asistentes a levar cunca e culler. 

A partir das 22:00 h. comezará a Foliada Guímara que contará coa presenza de Lagháchema, un grupo de cantadoras e tocadoras radicadas en Santiago de Compostela.