Félix Seijas, concelleiro de Deportes no Concello de Sarria, di estar satisfeito coa solución que se lle dá nesta edición a un evento de gran relevancia para a vila como é “A Milla Urbana”. A proba realizarase de xeito individual antes do 31 de decembro, previa inscrición nunha plataforma habilitada ao efecto, e ao rematala cada corredor deberá informar así mesmo dos resultados na web www.sarriacorre.com
“A inscrición terá un custe de 1 euro por participante, e o importe total do recadado doarase á Cruz Vermella de Sarria”, comenta Seijas. Un fin solidario da achega que dá dereito despois a participar no sorteo, entre todos e todas as participantes que rematen o percorrido, de 25 premios de 100 euros cada un. “Iso si, os 100 euros pagaranse presentando xustificantes de facturas expedidas por un comercio ou establecemento hostaleiro de Sarria”, engade o concelleiro de Deportes ao tempo que nos ofrece total garantía no sorteo realizado pola empresa que xestiona a plataforma da carreira Multisports Galicia, S.L.U. CC Norte Sports Timig.
DETALLES DESTACADOS DAS BASES REGULADORAS
Segundo se informa na web do Concello de Sarria:
Para participar cómpre inscribirse antes do 31 de decembro na páxina web www.sarriacorre.com e a inscrición terá un custe de 1 euro.
A carreira realizarase libremente polos deportistas tamén antes do 31 de decembro, a calquera hora dentro do horario permitido polas normas sanitarias de contención da Covid19. Rematado o percorrido o corredor ou corredora deberá subir o tempo empregado á paxina web indicada, identificándose co dorsal e data de nacemento no lugar indicado como “Rexistro de actividade”. Para completar este apartado pedirase tamén unha proba gráfica da carreira.
O percorrido é de 1,6 quilómetros con saída no Cuartel da Garda Civil e chegada no Campo de Fútbol de Ribela.
Respecto aos premios, establécense 25 de 100 euros cada un, e a forma de facelos efectivos será como reembolso tras presentar facturas a nome do premiado ou premiada expedidas por algún comercio ou establecemento de hostalería de Sarria e cun importe igual ou superior ao do premio. Exclúense facturas de grandes superficies ou supermercados xestionados por cadeas. No seu momento, os premiados e premiadas presentarán no Rexistro do concello copia do DNI, as facturas indicadas e número de conta.
A lista de premiados/as publicarase nas redes sociais, na web do Concello de Sarria e na propia páxina www.sarriacorre.com
