Preto de 200 nenos e nenas de 19 equipos de 12 clubs participantes darán os seus primeiros botes e encestarán as súas primeiras canastras este domingo disputando partidos en dous pavillóns deportivos de Monforte

A concentración, organizada polo CB Val de Lemos xunto co Concello de Monforte e a Federación Galega de Baloncesto –a través da súa Delegación Ourensá– comezará este domingo 20 ás 9:30 h. e levarase a cabo en dous pavillóns da cidade do Cabe: o da “Pinguela” e o do “Río Cabe”.  

Ás 12:00 h. está prevista a foto de grupo de todos os participantes na Pinguela e haberá unha sorpresa para eles que os organizadores non queren desvelar. Os equipos que xogan no pavillón do IES Río Cabe desprazaranse ata a Pinguela tras finalizar os seus partidos para saír na devandita foto e rematar a concentración xa nesta instalación.

Na categoría babybasket –que abrangue a nenos e nenas nados nos anos 2014, 2015 e 2016–, non hai marcador pois o máis importante é que estes o pasen ben, comecen a familiarizarse co deporte da canastra e adquiran valores como o compañeirismo ou a deportividade.