Os datos de desemprego de Galicia foron moi bos neste pasado mes de xuño, contabilizando 5.556 parados menos, e na mesma dinámica positiva entrou a provincia de Lugo cunha baixada de 499.
No que respecta á zona sur, referida ás comarcas de Sarria, Lemos, Chantada e Quiroga, os datos tamén son en xeral positivos. O desemprego baixou en 51 persoas.
A comarca de Sarria liderou a baixada cun total de 27 desempregados menos. Por detrás quedou Lemos con 20 parados menos e Chantada con 11. A nota negativa protagonízaa a comarca de Quiroga onde aumentou o paro en 7 persoas.
Dende o sindicato CC.OO. valoran en positivo estes datos pero avisan de que non se pode baixar a garda, pois seguen apuntados no INEM nesta zona sur 3.368 demandantes de emprego. Así mesmo advirten de que a contratación segue caracterizándose pola precariedade e a temporalidade alcanzando tan só un 8’7% de contratos indefinidos.
Por concellos, os números do paro de xuño facilitados pola organización sindical anterior son os seguintes:
comarca de lemos
No Concello de Bóveda hai 46 anotados no paro e baixou en 3 o número de desempregados, Monforte de Lemos contabiliza 1.042 e consegue reducir os parados en 17, Pantón baixa en 5 e queda cun total de 81 e A Pobra do Brollón mantén 65 desempregados. Sober e O Saviñao son os únicos concellos da comarca que suman anotados ao paro. Sober suma 2 e queda cun total de 94 e O Saviñao suma 3 parados máis, quedando cun total de 168.
comarca de quiroga
En Folgoso do Courel aumentou o paro en 4 persoas, quedando cun total de 44 desempregados, Quiroga suma 3 e queda con 182, mentres que Ribas de Sil queda igual, mantén os 49 parados.
comarca de chantada
O Concello de Chantada perde 5 parados, queda con 429, Carballedo resta 3 desempregados e ten agora 64, e Taboada baixa en 3 a conta quedando con 87.
comarca de sarria
O Concello de Sarria perde 24 parados e queda cun total de 728, Triacastela resta 1 e queda con 14, O Incio aumenta en 7 o número de desempregados, sumando un total de 61, Paradela resta 2 e queda con 39, Láncara disminúe en 9 e queda con 106, O Páramo queda con 34 despois de perder un parado e Samos aumenta en 2 quedando con 35.
A Secretaría de Acción Sindical de CC.OO ve tamén con preocupación que haxa 1.100 persoas en situación de extrema pobreza nas comarcas de Lemos, Quiroga e Chantada; e máis de 400 na comarca de Sarria.
Como engadido á valoración da creación de emprego de xuño, o sindicato indicado alédase da chegada da empresa Gallaecia Delicatessen a Monforte.