O concello de Sober abre un novo prazo, ata o 2 de marzo, para solicitar axudas para a rehabilitación de vivendas. O que será a quinta fase do ARI permitirá actuar en 24 vivendas de todo o termo municipal cun orzamento aproximado de 200.000 euros

A cuarta fase do programa subvencionado polo Ministerio de Fomento e o Instituto Galego de Vivenda e Solo está aínda en execución. Comprende 11 actuacións en vivendas privadas por importe de 228.000 euros, dos que o Goberno do Estado e o IGVS financian 94.000 euros. Na cuarta fase estanse a executar obras en Villaoscura, no Castro, en Villoriz, en Sober, en Santiorxo, Barantes, Bolmente, Canabal e en Amandi.

A terceira fase permitiu a mellora de 8 vivendas por un importe de 195.838 euros, dos que foron subvenciados 85.850 euros polo IGVS e o Ministerio de Fomento. Esta fase tamén contou cunha actuación pública, a urbanización do barrio de Figueiroá, por un importe de 28.099 euros, actuación para a que o Concello recibiu unha axuda de 11.900 euros. Na terceira fase, xa rematada, fixéronse actuacións en Proendos, en Ferrón, en Ousille, en Villoriz, en Sanmil, en Cacedo, en Barantes e en Sober, na capitalidade.

O persoal da Oficina do ARI atende no Concello de Sober os mércores e venres en horario de 09:00 a 14:00 horas.