Na Feira do Viño deste ano participarán 14 adegas e tras o éxito de pasadas edicións, a V Cata Popular seguirá sendo de balde e farase o sábado 7 de marzo entre as 17:00 e as 19:00 h. na carpa do recinto feiral. Como novidade para este ano, a organización presenta o 1º Túnel do Viño que estará localizado na entrada do Auditorio Municipal. Participar no mesmo custará 10 € e está dirixido a enólogos, técnicos vinícolas, restauradores e tamén a calquera persoa afeccionada á cultura do viño. Nel poderanse catar viños da subzona de Chantada presentes na Feira do Viño e celebrarase sábado 7 e domingo 8 de marzo dende as 11:30 ata as 14:00 h. e dende as 18:00 ata as 20:30 h.
O servizo da Cata Popular e do Túnel do Viño estará realizado polas rapazas e rapazas da Escola de Hostalería Belarmino Fernández Iglesias, única escola de hostalería da Denominación de Orixe Ribeira Sacra.
O pregoeiro desta 38 edición da ‘Feira do Viño de Chantada‘ será Ricardo González Fernández, empresario venezolano nos campos do entretemento e o deporte con raíces familiares na aldea chantadina da Lagariza (Santa María de Nogueira de Miño). A lectura do pregón realizarase trala actuación da formación tradicional local Searas.
Como en edicións anteriores, non faltará a música de rúa e as orquestras ao final de cada xornada de fin de semana. O recinto feiral abrirá xa as súas portas xa o venres 6 de 20:00 a 23:00 h. e durante a fin de semana os veciños, veciñas e visitantes poderán aproveitar a XII Feira de Oportunidades e a XI Mostra de produtos e artesanía. A carpa que acollerá estes dous eventos estará na Avenida de Monforte.
Os familiares que queiran deixar xogando ás/aos nenas e nenos -maiores de 3 anos- mentres dan unha volta pola Feira poden facelo na Casa da Música de Chantada. A empresa Velaísca farase cargo deles con actividades de entretemento sábado e domingo de 12:00 a 14:00 e de 16:00 a 20:00 h.
Coincidindo o domingo da ‘Feira do Viño’ co Día da Muller lerase un manifesto e posteriormente actuará o grupo local, de música tradicional, maioritariamente feminino: Searas. Será ás 12:45 h.
