Á vista das necesidades que se dan no servizo, especialmente nos grados de gran dependencia e dependencia severa, o concello decidiu reforzar economicamente o servizo, e solicitarlle á Xunta as horas pertinentes, “xa que é o organismo que ten as competencias para concedelas”, sinala a Tenente de Alcalde.

O concello tenta así desconxestionar a lista de agarda existente, axilizando o proceso de alta e reducindo o tempo de espera para o acceso ó servizo dun maior número de persoas en situación de dependencia, “que en moitos casos están sendo atendidos a través do servizo que o Concello dispón en  libre concorrencia e como medida de apoio mentres non acceden polo sistema de atención á dependencia”.

Sinalan desde o concello que a Xunta de Galicia é a que ten as competencias en servizos sociais, “e polo tanto no servizo de axuda no fogar, sen embargo destina soamente 12 € por hora fronte ós 19,12 € hora ordinaria e 21,98€ hora festiva que debe asumir o Concello. Consideramos necesario asumir este novo esforzo económico, para garantir un servizo axeitado e atender ás necesidades dos nosos usuarios”, asegura Gloria Prada.

O equipo de goberno salienta a prevalencia de avanzada idade das persoas dependentes que figuran neste servizo e a necesidade indispensable de atención nas actividades básicas da vida diaria principalmente das persoas gran dependentes, configurándose o SAF como un recurso de apoio fundamental. O concello de Monforte aprobaba en maio deste ano a adxudicación do contrato de Servizo de Axuda no Fogar á empresa Attende Care S.L por un importe de 5.513.724,58 € IVE incluído e un prazo de execución de tres anos.