A Agrupación de Interese Ecomómico Ribeira Sacra Next constituíase legalmente hai un ano e neste 2024, responsables da Agrupación centran os esforzos en darse a coñecer nos diferentes municipios da Ribeira Sacra de Lugo e Ourense. O obxectivo: poder contar con todos os municipios do territorio Ribeira Sacra como socios colaboradores da Agrupación.
A primeira destas reunións de presentación celebrouse cos alcaldes do Saviñao, Sober, Pantón e A Pobra do Brollón. Seguiulle encontro cos alcaldes de Nogueira de Ramuín e Monforte de Lemos. A Teixeira, Parada de Sil, Montederramo, Chandrexa de Queixa e Xunqueira de Espadanedo foron as seguintes citas de presentación da Agrupación que esta semana reuníase cos alcaldes de Quiroga, Ribas de Sil, A Pobra de Trives, Manzaneda e San Xoán de Río e alcaldesa de Castro Caldelas.
Desde a Agrupación amosan a súa satisfacción pola receptividade que está tendo a AIE Ribeira Sacra Next, “Tanto os concellos como outras agrupacións e asociacións importantes na zona aseguran que o proxecto lles parece interesante. Todos estamos dispostos a seguir sumando e medrando”.
Na axenda de próximas reunións figuran os concellos de Chantada, Carballedo, Portomarín, Paradela e Bóveda; ademais das deputacións de Lugo e Ourense. A Agrupación segue informando a empresas e autónomos/as interesados/as, mentres que hai entidades que ademais de animar o traballo que se está a desevolver, deron xa o seu si a formar parte como socios colaboradores. É o caso dos concellos de Sober, O Saviñao, Pantón, A Pobra do Brollón, Taboada, Castro Caldelas, Chandrexa de Queixa, Parada de Sil, Montederramo e Nogueira de Ramuín. Tamén quixeron entrar a formar parte como socios colaboradores a Comunidade de regantes, Fundación Belarmino Fernández, Prodeme e CCU de Monforte de Lemos.
A AIE conta, polo momento, con máis de 60 empresas que suman máis de 400 traballadores e unha facturación de máis de 90 millóns de euros. Todas as empresas e autónomos/as interesados/as en participar deste novo proxecto empresarial poden obter información e incribirse na web provisional da AIE, ribeirasacranext.gal
