Durante o acto, o presidente da Deputación destacou que estas operacións son fundamentais para impulsar o desenvolvemento económico da provincia, ao facilitar o asentamento de empresas que contribúen á creación de emprego e á xeración de riqueza no ámbito rural.
No polígono industrial de Paradela, situado no lugar do Gandarón, parroquia de Santa María de Vilaragunte, formalizáronse as vendas das parcelas números 15, 16, 17 e 18, cunha superficie total de 4.569 metros cadrados e un importe de 150.374,93 euros. O comprador é a empresa METAL POWER S.L, especializada en carpintería metálica. Actualmente, neste polígono quedan 13 parcelas libres, cunha superficie media de 1.000 metros cadrados, das 19 parcelas que conforman o parque, cunha superficie total de 32.280 metros cadrados.
Por outra banda, este martes tamén se formalizou a sinatura da compraventa dun lote de terreos que eran propiedade da Deputación de Lugo no lugar de Adega, na parroquia de San Facundo de Ribas do Miño, en Paradela. Un espazo que sobrou logo da construción dunha ponte construída pola institución provincial e que quedaron adxudicados ao Lar das Viñas López Otero, SL por un importe de case 30.000€.
