Nestas épocas do Nadal as familias xúntanse e no concello da Pobra do Brollón serán máis que o ano pasado porque o municipio incrementou a súa poboación nun 3,45% con respecto ao 2023 segundo vén de publicar o INE pasou de 1.565 no 2023 a 1.619 neste 2024. Falamos co alcalde, Xosé lois Maceda.

Que destacaría o alcalde deste ano 2024 na Pobra do Brollón?

O máis importante é que nas municipais do 23 o BNG renovou o goberno municipal, o que nos permite seguir implementando neste ano as políticas que poñemos en marcha. Neste punto o máis importante para nós e para os/as veciños/as é o inicio das obras da residencia, unha infaestrutura pola que levamos pelexando un montón de anos e por fin comezou a medrar o edificio. Esperamos que pronto se remate para poder desfrutalo. 

Ademais en toda a comarca os únicos concellos que estamos subindo poboación somos A Pobra do Brollón e Monforte de Lemos, que a xente queira vivir aquí é unha honra.

“Estamos a construír un goberno municipal de futuro”

Renovouse o goberno municipal pero coa perda dun concelleiro para o BNG.

Foi unha cadea de erros e aquí ninguén ten responsabilidades, pero hai moitas e diferentes, ou deixadeces máis ben, e acabamos perdendo un concelleiro. Seguimos no goberno porque tiñamos unha maioría folgada, pero esperemos que isto non se volva a repetir. Creo que habería que modificar a lei electoral porque ao final o resultado disto é que moitos veciños da Pobra do Brollón teñen representantes que non elixiron, o que resulta totalmente antidemocrático.

Estamos acometendo a renovación do grupo de goberno. Acaba de marchar un concelleiro por xubilación e estamos metendo concelleiros novos que dan un aire fresco ao goberno municipal e por outra banda estamos a construír un goberno municipal de futuro. Hoxe a política padece moita desafección. Tentamos que a xente nova se implique na política e nese traballo estamos.

Volvemos a esa residencia tan ansiada

Se non hai adendas a obra rematará no 2025 e a posta en marcha esperemos que sexa rápida, aínda que hai moitas xestións que confiamos apure a Deputación Provincial para poñela a disposición dos nosos maiores con 38 prazas.

Todo isto vén a complementar a cobertura que estamos dando en servizos sociais coa poboación máis sensible que son os nosos maiores e hoxe temos un centro de día, imos ter unha residencia e temos un equipo forte de servizos sociais que atende á dependencia.

Vivendas sociais / Concello da Pobra do Brollón

Recentemente adxudicamos parte das vivendas sociais e esa é outra das infraestruturas polas que levamos esperando anos. Por problemas administrativos foise demorando no tempo e hoxe temos tres vivendas ocupadas. Isto permite seguir mellorando medidas que permiten adaptar a nosa política social que para nós é prioritaria.

E o albergue municipal está resultando ser un servizo cunha importante demanda?

Podemos presumir na Pobra do Brollón de que temos un albergue que dá cobertura a todos eses peregrinos que pasan polo noso concello. 2500 peregrinos este ano no Camiño de Inverno, estase producindo un incremento importante con respecto a anos anteriores. Se isto segue así a medio prazo imos ter un grupo importante de peregrinos e xente que vai a pasar polo noso concello. O albergue vén a reforzar a nosa aposta decidida polos servizos turísticos que é outro piar básico da nosa acción de goberno.

O turismo é desenvolvemento económico e nós temos unha situación privilexiada para apostar polo turismo co Camiño de Inverno, a Ribeira Sacra, ser Reserva da Biosfera e estar nese tránsito entre o val e a montaña preto do Courel que para nós é o valor engadido para que a xente acuda á Pobra do Brollón a visitarnos.

“Aumentar poboación creo que é un indicador de que hai xente que quere vivir aquí”

As cores do outono / Concello A Pobra do Brollón

Entón cada vez temos máis visitantes e máis participantes nas visitas aos recursos turísticos e nas actividades culturais do concello?

Temos un programa cultural importante ao longo de todo o ano e ao final tentamos que A Pobra sexa agradable non só para vivir aquí por ofrecer infaestruturas e servizos, se non tamén por unha ampla gama de actividades diversas para que a xente que vive aquí teña o seu espazo e tempo de ocio cuberto e poidan sentirse a gusto. Trátase de humanizar o pobo con actividades para que resulte agradable e debe de selo porque nos últimos tempos estamos vendo unha grande cantidade de xente que desexa vivir na Pobra do Brollón. Aumentar poboación creo que é un indicador de que hai xente que quere vivir aquí e espero que iso siga sucedendo así.

Cantos de Taberna / Concello A Pobra do Bollón

Sen embargo este ano no sector do ensino denunciouse o abandono do rural, A Pobra do Brollón, foi un dos concellos que saiu a manifestarse.

O rural provoca estas situacións e cando temos un goberno autonómico que mira moito os números en lugar de mirar os servizos que hai que prestar no rural, isto conduce a que nos sigan recortando servizos, o que produce bastante desánimo. O rural poderíase converter nalgo atractivo pero ao goberno da Xunta éncheselle a boca dicindo que aposta polo rural cando o único que se fai e deixalo de lado.

Colexio da Pobra do Brollón concentración / Concello da Pobra do Brollón

Miramos xa para ao 2025, cales son os principais proxectos a acometer?

Temos proxectos nos que xa estamos traballando como a mellora do casco vello para ter unha vila máis agradable á vista. Acabamos de rematar a casa da xuventude que temos que dotala de mobiliario para ver como a xestionamos e que contido lle damos. Económicamente temos que mellorar a situación do concello que non é a que desexamos. E seguir avanzando en infraestruturas para os veciños e en mellorar a súa calidade de vida.

“Se somos unha sociedade madura temos que axudar”

O concello da Pobra do Brollón este ano tamén tivo tempo para colaborar con Valencia despois das inundacións.

A solidariedade é importante, nós sabémolo ben coa catástrofe medioambiental de fai case tres anos, o gran incendio da serra do Courel. Con nós volcáronse as administracións e moitos concellos e nós sentímonos na mesma obriga que os demais. Se somos unha sociedade madura temos que axudar.

Axuda Dana / Concello da Pobra do Brollón

Fálase moito de aprender dos erros a raíz deste tipo de desastres naturais e medio ambientais. Fíxose algo especial despois do incendio do Courel?

Sempre pasa o mesmo, unha vez que pasa olvidámonos de que temos que seguir limpando o monte, as fincas, e tratar de evitar unha situación parecida á acontencida. Todo segue igual e eu non vin cambios significativos. Non hai un plan para previr, hai que recordar que o cambio climático é evidente e temos unha grande cantidade de biomasa e iso é unha bomba nesta situación de cambio climático.