Este xoves día 6 a Axencia Galega de Desenvolvemento Rural (Agader), deu a coñecer os gañadores dos seus Premios ás Iniciativas de Desenvolvemento Rural 2019. Na categoría de turismo o galardoado foi o GDR Ribeira Sacra Courel nos concellos de Folgoso do Courel, Quiroga e Ribas de Sil polo seu proxecto “Xeoparque Mundial da UNESCO Montañas do Courel”.
En total, son oito os proxectos seleccionados nuns premios cuxo obxectivo é o de recoñecer propostas innovadoras que creen emprego e supoñan unha fonte de riqueza para o seu entorno. Cada un recibirá 10.000 euros que deberá reinvestir na iniciativa gañadora para realizar melloras ou executar accións complementarias.
Martín Alemparte, xerente do GDR Ribeira Saccra Courel, quixo compartir a súa satisfacción ante a noticia. “Queremos compartir o premio con todos os que creron no proxecto e traballaron conxuntamente para acadar o recoñecemento da UNESCO, o que converteu a iniciativa no primeiro Xeoparque Mundial da UNESCO do noroeste de España e o primeiro galego”, declarou Alemparte.
Os galardóns entregaranse o vindeiro 21 de xuño no Centro de Formación e Experimentación Agroforestal de Sergude, en Boqueixón.