Albores Saúde Mental, entidade sen ánimo de lucro que apoia ás persoas con enfermidade mental e ás súas familias, poñerá a andar nos vindeiros meses breves accións formativas sobre saúde mental nos colexios e institutos das comarcas do sur de Lugo para conseguir que tanto o profesorado coma o alumnado adquiran uns coñecementos básicos cos que previr doenzas relacionadas coa saúde mental, detectalas e/ou melloralas nas primeiras fases de aparición.
Segundo nos trasladan de Albores, a día de hoxe teñen programadas xa 6 accións formativas en IES das comarcas de Lemos, Chantada e Quiroga, accións que serán desenvolvidas por Raquel López González, psicóloga especializada en Psicoloxía da Intervención Social.
Aínda que teñen xa unha programación inicial pechada informan que non queda desbotada a posibilidade de realizalas noutras institucións. Neste senso aproveitan para animar a contactar coa asociación a aquelas entidades que estean interesadas nestas accións formativas.
Estas actividades serán posibles grazas ao Programa de Cooperación da Xunta de Galicia coas entidades sen ánimo de lucro, que financia o “Programa de prevención e abordaxe da exclusión social das persoas con enfermidades mentais”.
