O coeficiente redutor aplícase para rebaixar a idade ordinaria de xubilación en grupos profesionais incluídos no ámbito do Estatuto Mineiro para explotacións mineiras a ceo aberto e extracción de minerais entendendo que se trata de traballos tóxicos, penosos e con alto grado de perigosidade. No sector da pizarra, tan presente no sur de Lugo en concellos como Folgoso do Courel e Quiroga, tamén en Samos ou o Incio en menor medida, os traballadores levan tempo reivindicando, da man de Comisións Obreiras , a revisión de coeficientes que estaban xa obsoletos e a creación de novas categorías profesionais.
A Secretaría de Acción Sindical de CC.OO. Lugo valora con gran entusiasmo e satisfacción a recente resolución da Seguridade Social de asignar e recoñecer novos coeficientes redutores para diferentes categorías do sector pizarreiro a ceo aberto e o recoñecemento de novas categorías tecnolóxicas. O sindicato lembra que esta resolución conseguiuse tras unha petición que lles fora trasladada hai algo máis dun ano, concretamente o 23 de marzo de 2018, e que beneficiará a moitos traballadores/as das canteiras de pizarra de Quiroga e Folgoso do Courel.
Unha boa nova para traballadores do sector da pizarra que supón a actualización á alza do coeficiente redutor para as seguintes categorías profesionais: gruistas, embaladores, carretilleiros, encargados de naves, canteira e talleres, mecánicos e electricistas. Todos os traballadores destas categorías, así como tamén os axudantes das mesmas, pasan a ter un coeficiente redutor do 0,10, o que significa que verán anticipada a idade de xubilación nun ano por cada dez traballados. Ata a resolución comentada o coeficiente era do 0,05.
Outra boa nova da decisión da Seguridade Social é que se recoñecen como novas categorías tecnolóxicas as seguintes: controlador de calidade, operador de corte e operador de voadura. Os traballadores destas categorías e os seus axudantes gozarán tamén do coeficiente reductor anterior, o 0,10.
Os titulados medios e superiores: enxeñeiros, topógrafos e xeólogos, seguirán rexéndose polo coeficiente do 0,05.
Mario Docasar, Secretario de Acción Sindical de CC.OO., lembra que eran moitos os traballadores/as das pizarreiras que levaban anos solicitando esta revisión e agora xa se pode dicir que se conseguiu, e que ademais terá carácter retroactivo aplicándose así no cómputo de todos os anos que se leven traballados no sector.
Segundo cifra tamén Docasar, a resolución da Seguridade Social favorecerá a máis de 300 traballadores/as en activo pero tamén a moitos parados/as do sector que non se poden cuantificar.
Dende o sindicato agradecen a boa disposición tanto do Ministerio de Traballo como do Director Xeral de Minas da Xunta de Galicia para alcanzar esta mellora laboral.
