O Grupo Parlamentario Mixto, a través da deputada Paula Vázquez Verao, e dos deputados Luís Villares Naveira e David Rodríguez  Estévez, vén de rexistrar unha PNL -Proposta non de Lei- no Parlamento de Galicia instando á Xunta a trasladar ao Goberno do Estado a necesidade de dotar Monforte cun tren diario que saia a tempo para enlazar co AVANT que sae de Ourense ás 7:55, así como un tren de volta dende Ourense a Monforte para poder usalo na mesma xornada.

Lembran que a situación ferroviaria do interior galego leva anos deteriorándose coa desaparición de múltiples servizos ferroviarios, tanto de mobilidade de viaxeiras como de mercadorías, e coa falta de mantemento da infraestrutura, problemas aos que lle hai que sumar a diminución e o avellentamento do cadro de persoal. Ultimamente, aumentaron as avarías de trens e agravouse a falta de maquinistas. A falta de persoal faise patente cando, tras unha avería, chega a xente en bus e non hai quen poida axudar coas maletas, nunha estación que non conta con ascensor para cruzar as vías.

Sinalan así mesmo que “a situación das frecuencias e tipos de tren entre Monforte e Ourense fan inviable poder moverse para traballo ou estudos entre ambas cidades e con Santiago. Un novo servizo que conectase diariamente cos AVANT de Ourense permitiría a mocidade e ás persoas en xeral estudar ou traballar en Ourense, Santiago ou Coruña sen ter que vivir alí, e facilitaría a mobilidade a estas cidades, dende o punto de vista do turismo ou as xestións administrativas”.

Ademais desta iniciativa, En Marea ten presentadas propostas para a defensa do emprego no taller de RENFE de Monforte ou a urxencia de mellora de accesibilidade da estación de Monforte, que carece dun ascensor para cruzar os andéns ademais dun déficit de sinalización do perigo de cruzar as vías.