“Crearemos unha nova liña de axudas específicas para nosas cinco denominacións de orixe”. É o compromiso que adquiriu este domingo a candidata de Ciudadanos á Presidencia da Xunta, Beatriz Pino, tras visitar unha adega en Doade, na Ribeira Sacra.
Na visita, articulada para coñecer de preto a situación do sector, Pino estivo acompañada pola conselleira de Cultura da Comunidade de Madrid, Marta Rivera, e o eurodeputado de Ciudadanos Adrián Vázquez.
A candidata lembrou que a pandemia golpeou con forza o sector vitivinícola. “O noso país é o país con máis hectáreas de viñedos e o cuarto que máis viño produce do mundo. Se nos fixamos en Galicia, a nosa terra conta con 13.400 viticultores e 479 adegas“, destacou.
Neste sentido, asegurou que con estes datos, “un podería pensar que o Goberno de España destinou unha cantidade xenerosa en axudas para que os adegueiros e viticultores poidan facer fronte a esta crise”, pero contrapuxo que, con todo, “o dato é lamentable”.
A modo de exemplo, indicou que, “dos só 90 millóns de euros orzados polo Goberno, chegarán a Galicia apenas uns 300.000 euros”.
SENTAR CO MINISTRO DE AGRICULTURA
En fronte, Pino prometeu que, se chega á Xunta, sentará co ministro de Agricultura “para que esa irrisoria cantidade se amplíe e poidan acollerse a esas axudas, hoxe tan necesarias para este sector, as adegas de Galicia”.
“Non pode ser que as axudas do Goberno de España non teñan en conta as especificidades dos nosos viñedos, que nada teñen que ver cos de Castela-A Mancha ou Castela e León. As axudas da Xunta non irán enfocadas unicamente á poda en verde ou á destilación. Haberá outros criterios máis específicos”, defendeu.
Pola súa banda, a conselleira da Comunidade de Madrid, Marta Rivera, sinalou a importancia que ten o viño como un produto turístico. “As rutas de viño teñen que estar máis explotadas en Galicia”, incidiu.
SOBRE AS ENQUISAS
Pino asegurou que, fronte ás enquisas publicadas que coinciden en que o popular Alberto Núñez Feijóo logrará preservar a súa maioría absoluta, a única sondaxe “totalmente fiable” é a das urnas o próximo 12 de xullo.
En declaracións aos medios, Pino defendeu que Galicia pode estar ás portas dun cambio, un “cambio que pode ser a peor e terrible para os galegos, cun Goberno da man de populistas e nacionalistas”, pero tamén “un cambio a mellor”.
“Un cambio a mellor con Cs formando parte do Goberno de Galicia”, proclamou, antes de insistir en que a formación laranxa segue “con esa man tendida” ao PP de Feijóo “sabendo” que pode ser “o valor engadido ao Goberno da Xunta”.
“Non queremos ver a Galicia e ao galegos catro anos máis varados e inmóbiles nunha situación ante a que non temos futuro nin oportunidades. Queremos poder contribuír e enriquecer. Quero estar nese Goberno, queremos formar parte del porque teremos moito que gañar”, aseverou.
