O BNG de Monforte vén de visitar á veciñanza da parroquia das Nocedas para coñecer a situación dos servizos básicos, responsabilidade do Concello. Como o fixera hai máis dun ano, os veciños insistiron na deficiencia do servizo de subministro de auga potable no lugar do Mato. “Non deixa de chamar a atención o desleixo do Alcalde, José Tomé Roca, a este respecto, escondendo a súa responsabilidade detrás da empresa Aqualia, no canto de resolver o problema, xa presentado no pleno municipal hai máis dun ano polo concelleiro nacionalista”, sinala Emilio Sánhez.

A criterio do portavoz nacionalista, a solución pasaría por conectar este barrio coa rede xeral da parroquia -apenas un quilómetro- xa que no resto dos lugares contan cun servizo axeitado de subministro de auga.

O concelleiro nacionalista, Emilio Sánchez Iglesias, afirma que non se pode aspirar a manter un rural vivo, se non hai interese en manter os servizos máis básicos e elementais.