O BNG do Sur de Lugo vén de realizar encontros con outras comarcas galegas afectadas polo mal estado da actual N-120, así como con agrupacións empresariais, sociais e de defensa medioambiental, e tiraron a conclusión, de que sexa cal for a planificación futura, no momento actual “é prioritaria a infraestrutura da N-120 para o desenvolvemento dos territorios polos que transcorre”.

A Responsable Comarcal do BNG, Rosa Ana Prieto Florines, explica que “as infraestruturas en bo estado son imprescindibles para o noso desenvolvemento socioeconómico, e na actualidade a N-120 é a nosa principal vía de comunicación tanto coa meseta, como coas Rías Baixas ou co Norte de Portugal”.

Dende o BNG consideran urxente o arranxo do firme e o aumento de carrís nalgúns tramos, así como no medio e longo prazo acometer obras de maneira integral na vía que constitúan unha solución sostida no tempo que axude a parar a sangría demográfica que sofre o interior galego. Amósanse optimistas os nacionalistas que agardan que o Goberno de España dote de partidas económicas suficientes as obras de mellora urxente e integral da N-120.